Lonxe dos momentos de inquedanza que estamos a vivir, dos negros horizontes que o mar disputa coa terra e os que desde ela non a entendemos, a pintura continúa firme no seu diálogo co home e a sociedade. Galicia é xerme de pintores, de pinceladas que mergullan na alma dunha sociedade tinguida de ilusións, que a cada paso acada, mediante o afondamento na súa cultura, facerse máis forte e poderosa. A pintura cada vez fala máis alto do que unha terra é capaz de ofrecer, e os nomes que neste volume presentan unha traxectoria consolidada, aínda que con pleno coñecemento dos discursos internacionais, fan unha recomposición do seu intimismo creativo e bótano enriba de todos nós para nos facer partícipes da súa ledicia. Abstraccións, realismos, expresionismos, son todas actitudes válidas ante o cadro e ante a vida, o xogo interior á hora de pintar exteriorízase e vincúlanos coa arte facéndonos xogar tamén a nós.