Arquitectura modernista, ecléctica e rexionalista
Antonio Palacios • Julio Galán • J. López Rego • R. Ucha Piñeiro • M. Gómez Román • José Franco Montes • A. López • R. Boán • Leoncio Bescansa • J. de la Fuente Álvarez • A. Cominges • Eduardo Rodríguez • Pedro Mariño • D. V. Gulías • Conde Fidalgo
ISBN: 84-87755-95-X
Non é doado recoller nun mesmo estudio a variedade de respostas artísticas dadas polos homes que cruzaron a fronteira do século XIX ó XX. No caso dos arquitectos galegos, atopámonos cun grupo de profesionais formados nas escolas de arquitectura de Madrid e Barcelona, que deberon atravesa-la antesala da modernidade, sen poder, en moitos casos, acceder ás correntes máis vangardistas do momento.
Trátase de arquitectos formados no Eclecticismo final do século XIX, que tiveron que desenvolve-lo seu labor profesional en Galicia, desconectados dos centros sobranceiros da producción arquitectónica. Arquitectos periféricos e en moitos casos illados, que souberon sen embargo coas súas viaxes, ou mediante as subscricións a revistas, estar o suficientemente informados e mesmo á altura de calquera destacado arquitecto europeo.
Durante as catro primeiras décadas do século XX, que se estudian neste volume, estes mestres deberon elixir entre a maraña estilística da época, adoptando o Modernismo, o segundo Eclecticismo ou o Rexionalismo, segundo a súa propia intuición ou os mandatos da moda.
Coincidiu ademais este período de puxanza constructiva nas cidades galegas cun auténtico deseño personalizado, no que cada casa ou cada edificio responde a unha idea propia e ofrece unha imaxe específica e diferente, lonxe da homoxeneidade dos estilos tradicionais ou da simplificación formal na que derivará a posterior arquitectura racionalista.
Do Racionalismo á Modernidade
Rafael González Villar • Antonio Tenreiro y Peregrín Estellés • S. Rey Pedreira • Eloy Maquieira • J. M. Banet Díaz-Varela • Fco. Castro Represas y Pedro Alonso • A. Álex Reinlein • J. Caridad Mateo • Alejandro de la Sota • Molezún y Corrales • X. Bar Bóo • A. Fdez. Albalat
ISBN: 84-96070-30-1
Atopámonos ante un libro que estudia os pioneros da arquitectura moderna en Galicia e que é imprescindible para esclarece-los avatares da mesma.
Pódese interpreta-la selección de arquitectos que constitúe o libro dentro de tres grupos, que coinciden coas tres primeiras xeracións de arquitectos do Movemento Moderno. Esta coincidencia xeracional tamén sinala certos paralelismos no desenvolvemento das traxectorias profesionais: a formación beaux arts ou académica recibida pola primeira xeración; a progresiva adecuación ós tempos que a industrialización e a modernidade marcaban; e a busca, especialmente na terceira xeración, de particularidades locais para compatibilizalas cos ideais da arquitectura racionalista.
No primeiro grupo, formado por aqueles nados ó redor das últimas dúas décadas do século XIX, ó igual ca Mies van der Rohe e Le Corbusier, atópanse Rafael González Villar, Peregrín Estellés, que aínda que naceu en Valencia desenvolveu o seu labor profesional en Galicia, e Antonio Tenreiro. Nun segundo grupo sitúanse aqueles nados nas primeiras décadas do século XX: José Mª Banet e Díaz-Varela, Santiago Rey Pedreira, Francisco Castro Represas, Antonio Álex Reinlein, Pedro Alonso Pérez, nado en Madrid, Eloy Maquieira e José Caridad Mateo. E a terceira xeración, formada por Alejandro de la Sota, José Antonio Corrales, nado en Madrid, e Ramón Vázquez Molezún, Xosé Bar Bóo e Andrés Fernández-Albalat Lois.
Da Ilustración
ó Eclecticismo
D. A. Lois Monteagudo • Carlos Lemaur • J. Sánchez Bort • M. Ferro Caaveiro • Melchor de Prado Mariño • Alejo Andrade • Manuel de Prado y Vallo • Faustino Dguez. Dguez. • Faustino Dguez. Coumes-Gay • Domingo y Alejandro Rguez. Sesmero • J. de la Fuente Dguez. • Gabriel Vitini • M. Pereiro Caeiro • Nemesio Cobreros • Juan Álvarez de Mendoza
ISBN: 84-96070-82-4
Ata hai ben pouco, tanto a crítica arquitectónica como a historiografía artística en xeral tiñan mostrado escaso aprecio e interese pola arquitectura que se realizou en Galicia a partir da segunda metade do século XVIII e ata os comezos do século XX. Por fortuna esta apreciación remitiu nos últimos anos e hoxe comeza a valorarse na súa xusta medida a contribución que os arquitectos deste tempo deixaron ó noso rico patrimonio monumental. Boa proba diso son os distintos estudios que se recollen precisamente neste volume e que pretenden poñer en valor o labor creativo dalgúns artífices do período que foron capaces de realizar moitas obras excelentes e algunhas, mesmo, dun interese incontestado verdadeiramente excepcional.
Da modernidade
ó século XXI
José Javier Suances • Rafael Baltar Tojo • Manuel Gallego Jorreto • Carlos Enrique Meijide • Yago Bonet • César Portela • Manuel Andrés Reboredo • Alberto Noguerol y Pilar Díez • Celestino García Braña • Alfredo Freixedo • Iago Seara • Pedro de Llano, Alfonso Penela Fdez.
ISBN: 84-96070-92-1
Este volume, dedicado ós arquitectos galegos nacidos entre os anos trinta e cincuenta, permite unha visión sobre o conxunto dos protagonistas da arquitectura galega das tres últimas décadas do século XX. Este grupo heteroxéneo queda cohesionado polo compromiso con Galicia. Todos, con diferentes formacións, actitudes intelectuais e credos arquitectónicos, traballan nun mesmo contexto cultural, social e económico, e deron unha resposta arquitectónica a este estado de cousas.
As obras dos trece arquitectos incluídos revelan, ó se observar reunidas nas seguintes páxinas, nexos comúns, exploracións complementarias, posturas que se suman e, o máis revelador, trazos coincidentes. O legado moderno como referencia, na súa adopción ou rexeitamento, a relación co lugar como primeiro mandamento, o valor do material, a contundencia volumétrica e un certo sentido de masa e peso poden entenderse coma un conxunto de trazos que conforman un aire de familia, aínda que os seus membros sexan tan diferentes..