Realismos rexionalistas
Asorey • Xosé Eiroa • Cristino Mallo • Antón Faílde • Camilo Nogueira • Uxío Souto • Bonome • Narciso Pérez • Compostela • Acuña • Madariaga • Arturo Baltar • A. Vilar Lamelas
ISBN: 84-96070-25-5
Este volume agrupa unha serie de artistas que foron claves no proceso renovador da escultura galega anterior á Guerra Civil de 1936, proceso paralelo ó renacer vangardista da xeración de Os Novos en pintura -a nosa particular xeración do 27, que se opón ó modernismo anterior- cuns protagonistas que ofrecen unha visión moderada desde posicións de linguaxe baseadas nunha tradición que se rebela contra o tópico costumista e admite a interferencia de determinadas realidades dos “ismos” contemporáneos, especialmente do Expresionismo ou das revisións figurativas do Cubismo.
A xénese destes artistas haberá que buscala nunhas constantes que marcan a especificidade do seu traballo: na tradición, que se remonta ós canteiros castrexos e a tódolos traballadores da pedra, ós que tallaron a imaxinería popular de tímpanos, cruceiros, petos, capiteis, etc. O granito e a madeira serán os seus materiais básicos. As referencias formais ó Románico e ó Barroco son producto dunha investigación, ligada á propia orixe do que eles consideran identidade artística. Descubri-las esencias antropolóxicas do mundo rural, as raíces dunha cultura milenaria lévanos ó primitivismo que se reflicte no tratamento formal: o escultor é, ante todo, un bo psicólogo e afonda como tal na alma dese retrato intemporal que nos sitúa en Galicia e no mundo, á vez.
Figuracións- Abstraccións
Juan Oliveira • Eiravella • Buciños • Camilo Otero • Elena Colmeiro • Xosé Cid • Acisclo Manzano • Manuel Coia • Xoán Piñeiro • J. L. Penado • Jesús Valverde • Otero Besteiro • Ferreiro Badía
ISBN: 84-96070-05-0
Os escultores do presente volume son centrais no discorrer da arte galega das tres últimas décadas e, de xeito especial, ó longo dos anos sesenta e setenta, posto que eles son os protagonistas da transformación da estatuaria, de corte moi tradicional, de monolítica talla directa, en favor dunha concepción máis ampla, for na poética das formas e das linguaxes que sintonizan cos contextos internacionais do Vangardismo, for doutros materiais, entre os cales adquiren certa prestancia algúns históricos, como o bronce ou o barro, e os máis experimentais, como o ferro, o aceiro, o formigón e os industriais. Acontece isto igualmente na consideración da escultura como monumento público e na opción das renovadas poéticas do espacio, da natureza ou da desaparición da peaña, xa a finais dos setenta.
Así, pois, os trece escultores que presentamos non son só trece olladas da diverxencia ou da pluralidade de linguaxes que existiron na Galicia dos últimos corenta anos, son tamén síntomas dun diálogo necesario, en termos de linguaxe plástica, entre este Noroeste e o mundo, é dicir, entre o territorio que lles dá unha filiación cultural e unha marca de tradición, e as experiencias estéticas que definiron a arte internacional no último medio século.
Realismos-Abstraccións
Soledad Penalta • Xuxo Vázquez Pardo • José Galán Suárez • Pedro Dobao • Suso Fernández • Álvaro de la Vega • José Castiñeiras Iglesias • Ramón Conde • Ángeles Valladares • Magín Picallo Durán • Xosé Manuel Castro • Lomarti • María Carretero • Francisco Pazos Pazos • José Antúnez Pousa
ISBN: 84-96070-58-1

Neste volume dedicado á escultura realízase un estudio pormenorizado da traxectoria e da obra de quince escultores que desenvolveron a súa actividade máis madura desde os anos oitenta e sobre todo os noventa.
Quince proxectos artísticos que se sitúan entre a revisión da escultura, a renovación da tradición, a ollada posta na natureza, a revisión das relacións home e espacio, a recuperación da figura humana, a ruptura cos límites da escultura ou o Eclecticismo. A análise formal debátese entre a figuración máis realista e a abstracción, entre as formas constructivas e as biomórficas. Utilizan un gran repertorio de materiais: nobres, principalmente o granito; industriais, entre os que destaca o aceiro, e mesmo materiais de refugallo, como parabrisas de automóbiles accidentados.
Expresionismos-
Abstraccións
Francisco Leiro • Paco Pestana • Mon Vasco • Fernando Casás • Manolo Paz • Ignacio Basallo • Xavier Toubes • Xurxo Oro Claro • Luis Borrajo • Enrique Velasco • Manuel Patinha • Moncho Amigo
ISBN: 84-96070-87-5
O marco estético adecuado para posiciona-lo traballo dos escultores aquí tratados é o das vicisitudes dos últimos vintecinco anos en Europa, horizonte crucial na transformación da arte en Galicia, que é cando os seus protagonistas rompen os límites tradicionais das linguaxes e optan polos modos experimentais, modos que permiten que poidamos confrontar, sen complexos, os seus proxectos cos que poboan o circuíto internacional. Os doce artistas aquí reunidos exemplifican non só o máis interesante que deu a escultura galega despois da Guerra Civil, senón que, cos seus traballos, diversificados lingüisticamente, lograron introduci-lo seu interese noutros ámbitos. Salvo o caso de Mon Vasco, falecido, todos eles áchanse no cénit da súa madureza creativa e souberon responder ás novas formulacións dunha escultura que vive a dilución dos xéneros tradicionais, mesmo nun diálogo tan pertinente como é o que confronta a dimensión pública de aquela coa cidade ou coa natureza.