Nova Galicia Edicións, S.L. nace en Vigo no ano 1984 co obxectivo de dar a coñece-la cultura galega ó resto do mundo. Para iso dedícase á publicación de libros de arte en tódalas súas ramas, así como a recuperar documentos históricos sobre Galicia para a súa edición facsimilar.
No ano 1997 iniciou o proxecto Artistas Galegos, que como proxecto privado está consolidado nos dezasete volumes editados ata o de agora, estando nove máis en fase de producción. Lévanse tratados cento oitenta e oito artistas (pintores, escultores e arquitectos) e reproducidas aproximadamente 8.000 obras de arte, o que supón 4 millóns de cm2. Estamos a falar pois dun Museo da Arte Galega en soporte papel.
Así mesmo, dende o ano 2000, Nova Galicia ven realizando as edicións en galego e portugués da colección “Nova Galicia Arte”, monografías dedicadas ós máis importantes artistas da pintura universal nas que xa están publicados Van Gogh, Monet, Rembrandt, Cézanne, Leonardo, Piero della Francesca, Matisse, Picasso, Kandinsky, Velázquez, Renoir e Gauguin. Edítanse un mínimo de seis ó ano e está previsto que sexan un total de trinta e dous volumes.
O éxito comercial e principalmente cultural das dúas devanditas obras non foi somentes un pulo para Nova Galicia Edicións, que os afrontou sen financiamento público, senón que supuxeron un incremento do Patrimonio Cultural Galego dende o sector privado.
Ademais ten publicadas as seguintes coleccións: “A Nosa Terra 1916-1936”, “A Nosa Terra Exilio 1942-1972”, “Índice A Nosa Terra”, “A Fouce”, “Galeuzca”, “O Tio Marcos d’a Portela”, “Nós” e “Os Cabalos da Troula”.
Nova Galicia Edicións está a facer unha proxección internacional coa súa presencia nas principais feiras do libro de todo o mundo, co resultado, nestes intres, de negociacións de edicións de “Artistas Galegos” noutras linguas como son o esloveno e o portugués (agora en galego, castelán e inglés) e mesmo ventas en dezanove países, entre outros: China, Eslovenia, EE.UU., Costa Rica, Venezuela... A exportación no ano 2000 supuxo un 43% da nosa facturación.
Sen deixar de mirar cara ó futuro, a fin de presentar novos productos galegos con proxección universal mantendo os mercados xa abertos, esta editorial está a traballar ademais en varios proxectos, entre os que destaca: Arte de Galicia e Norte de Portugal, sendo a primeira obra que recompila todo o valioso patrimonio cultural que une a estas dúas terras.